1 Corinthians 14

Goti Auneme'amo'mo Goti ali'ya'amo alisayafe'mo hogote ya'mo alino ne'apamiya kavafe'mo ava gemo hu'niya gemae

1Lapau lapayamopafi'mo lapausiya kava'mo alisayafe'mo lapaya mukiki hutapa vegala aelitutapa atafaiyo. Lapakaemo Goti Auneme'amo'mo alino ne'apamiya himamu'amo Goti ali'ya'amo alisaya himamu'amo alisayafe'mo lapa'ye hino. Hogotetapa Gotitegati gemo alinitetapa aeta hakalo hutapa hapa paisaya himamu'amo alisayafe'mo lusi kava huno lapa'ye hino. 2Alu apake alu apakemo ne'aiya vaya'mogi afisaya agufa gefati'mo nosaya'mofe'mo vaya'aife'mo ge nosafa Gotifeke'mo ge nehae. Apakaemo alino fala ki male'niya gemo Goti Auneme'aleti'mo ali'a afole ai'a atete'a hapa nepaiye. 3Hapa nepaiya'monanafa Gotitegati gemo alini e'a ae'a hakalo hu'a hapa nepaiya vaya'mogimo ali'a lokiya vai'a apatege alagepa kava'mo hisayafe'mo ali'a he ti'a apatege hanageke ya'mo ne'aliya vaya'mo hapa maege hu'a hapa nepaiye. 4Alu apake alu apakemo ne'aiya vaya'mogi apakai'apige'mo hapa ne'maya'monanafa Gotitegati gemo alini e'a ae'a hakalo hu'a hapa nepaiya vaya'mogimo siosi vaya'mo hapa ne'mae. 5Muki'amogitapamo alu lapake alu lapakemo aisayafe'mo nahau'niya'monanafa muki'amogitapamo Gotitegati gemo alinitetapa aeta hakalo hutapa hapa paisayafe'mo mago'e huno nahau'niye. Alu apake alu apakemo ne'aiya vaya'mogimo siosi vaya'mo hapa maesayafe'mo ali'a afe le'a hapa opaisage'apae'mo Goti ge'amo ae'a hakalo hu'a hapa nepaiya vaya'mogimo ae'a ne'apakasae.

6Konaga'nimogitapae, hu'na, Nagaemo lapakaetegamo u'na ava'yi hute'nae'mo alu nage alu nagemo aisuvana haiya kava hu'na lapa maegauve. Lapa o'maegauva'monanafa Goti'a alino nave li'niya gemo lapa paisufi afisaya agufa gemo hu'na lapa paisufi Gotitegati'mo ge'amo ali'na ae'na hakalo hu'na lapa paisufi ali'na lapaya malesufi hu'na osisuvana lapa o'maegauve. 7Mago afa'a maisiya ya'amo ohane'niya yate'mo amaginageno age ai'niya age'e gitamo amaginageno age ai'niya age'e'mo hane'niye. Alu age alu agemo o'aisiyana haiya kava huta agemo afita aeto hugune. 8Ani kava huno pikulimo'a alagepa huno age o'aisiyana kame hisaya vaya'mo alo osugae. 9Ani kava hutapa afisaya agufa apakefati'mo hapa opaisaya'mo'mo haiya kava hu'a afigae. Getapimo afa'age'mo uno kasaegaiye. 10Ma mopafi vaya'mogimo alu apake alu apakemo ne'aigeno'ae'mo muki ani ne'aiya apake'amo'mo aepa'amo hane'niye. 11Mago vekamo'a hisiya gemo o'afi'nae'mo, alu nofi vekamo mai'niye, hu'na hisugeno'ae'mo nagaefe'mo alu nofi vekamo mai'niye, huno hugiye. 12Lapakaemo Goti Auneme'amo'mo alino ne'apamiya himamu'amo Goti ali'ya'amo alisaya himamu'amo alisayafe'mo lapaya mukiki nehaya'mofe'mo hogotetapa muki siosi vaya'mo hapa maesaya ya'mo ali'netapaeke'mo hapa maeyo.

13Nehaya'mofe'mo alu apake alu apakemo ne'aiya vaya'mogimo, ani gemo ali'na afe le'na hisuvafe'mo himamukamo alika namiyo, hu'a nunumu hiyo. 14Alu nagemo ai'na nunumu hisuvana naune'name'mo'a nunumu nehiya'monanafa nagesamo'a alagamo alino afole aino o'atesigeno apakesafi'mo alagamo o'aegaiye. 15O'aegaiya'mofe'mo na agufa kava'mo huguve. Naune'namepati'e nagesafati'e'mo nunumu huguve. Naune'namepati'e naipa nagesafati'e'mo yokemo huguve. 16Lapaunelapame'eke'mo nunumu hisage'apae'mo haiya kava hu'a saufa vaya'mo apakesa afi'a fatago hugefe'mo nehisaya vaya'mogimo nunumu hisaya gelefe'mo he lama ge, hu'a afa'a hugae. Getapimo o'afigaya'mofe'mae. 17Lapakaemo Gotifeke'mo alagepa nunumu hutapa hao ke nehaya'monanafa ne'afiya vaya'mo hapa no'mae.

18Nagaemo alu nage alu nagemo ne'ai'na ae'na lapakase'nova'mofe'mo Gotife'mo hao ke nehova'monanafa 19nagaemo siosi vaya'mo ali'a anupa hu'a maisayategamo naya magokayaga'a kefafa'amo afisaya agufa kefafa'amo hapa paisuvafe'mo nahau'niya'monanafa muki teni tauseni'a kefafa'amo alu nage alu nagemo ai'na hapa paisuvafe'mo o'nahau'niye.

20Konaga'nimogitapae, hu'na, mafa'ne anaga'mogimo ne'afiya agufa lapakesamo o'afiyo. Vaya'aitegamo hosu kava'mo hisayafe'mo aise mafa'negana hutapa maiyo. Maigaya'monanafa gemo aepa'amo afisayafe'mo alopa vayakana hutapa maiyo. 21Ala kava ne'mo'a ke'aepa ge'amo mukufi'mo avo kae male'niya gemo'mo huno'ae'mo,

Nagaemo mani vaya'aife'mo alu apakemo ne'aiya vaya'ai apavayafati gemo alu haopalegamo mai'naya vaya'ai apavayafati'mo hapa paiguva'monanafa ani gemo o'afigae,
huno hu'niye.

22Hu'niya'mofe'mo Goti'a apakesa afi'a fatago nehaya vaya'aife'mo alu apake alu apakefati'mo hapa paino'ae'mo, amuse hu'na nolapatove, huno alino apave nolifa apakesa afi'a fatago nosaya vaya'mo alu apakefati'mo alino apave neliye. Apave neliya'monanafa Gotitegati gemo alini e'a ae'a hakalo hu'a hapa nepaiya vaya'mogi apakesa afi'a fatago nosaya vaya'aife'mo hapa nopaifa apakesa afi'a fatago nehaya vaya'aifeke'mo hapa nepaiye. 23Muki siosi vaya'amo e'a ali'a anupa hu'a mai'ne'apae'mo alu apake alu apakemo ne'aisage'apae'mo saufamo apakesa afi'a fatago hugefe nehisaya vaya'mogimofi apakesa afi'a fatago osu'naya vaya'mogimofi hu'a e'a afite'apae'mo negi nagi gemo nehaya vaya'mo mai'nae, hu'a hugae. 24Hugaya'monanafa alita anupa huta mai'netapae'mo mago vaya'amogitapamo Gotitegati gemo alita aeta hakalo hutapa hapa nepaisageno'ae'mo mago agesa afino fatago osu'nisiya vekamo'mofi saufamo agesa afino fatago hugefe'mo nehisiya vekamo'mofi eno ne'afisigeno'ae'mo Goti ge'amo'mo aipafi'mo kevegana huno haeteno agoti huno atesigeno'ae'mo hosu kava'amo agegaiye. 25Aipafi'mo fala ki'nisiya kava'amo aulagale'mo afole aisigeno ageteno'ae'mo mopafi'mo asagauno aiteno Gotife'mo mono nehuno'ae'mo, Lama gemo nehuve, Goti'a lapakae'e'mo magokepi lokaeno ne'maiye, huno aeno hakalo huno lapa paigiye.

Mono kava'mo alino api aino ate'niya gemae

26Konaga'nimogitapae, hu'na, mani gemo nehuva'mofe'mo na kava hisaya kava'mo hane'niye. Afiyo, lapakaemo alita anupa huta mai'netapae'mo muki'amogitapamo lapamete lapamete hutapa ge nehae. Mago vekamo'mo yokemo lekana paino huge mago vekamo'mo alino lapaya malege mago vekamo'mo Goti'a alino ave li'niya gemo lapa paige mago vekamo'mo alu age aige mago vekamo'mo alu agemo alino afe leno lapa paige hutapa ne'maiye. Lapakaemo ika ika kava'mo osutapa siosi vaya'mo alita lokiya vaitapa apatesayafe'mo muki kava'mo alita alagepa hutapa hiyo. 27Alu apakemo ne'aiya vaya'mogimo ge'apifati'mo hugefe'mo hu'apae'mo lole vekala'mofi lole'e mago'e vaya'mogimofi hu'a ge hute hute hu'a hisageno'ae'mo magoke vekamo'mo ani gemo alino afe leno lapa paigiye. 28Mago vekamo'mo ani gemo alino afe leno lapa paisiya vekamo o'maisigeno'ae'mo alu age ne'aiya vekamo'mo siosi vayapi'mo ge osuno afa'a mai'neno agai'a aipafi'mo huge Gotife'mo huge huno maino. 29Lole vekala'mofi lole'e mago'e vaya'mogimofi hu'a Gotitegati gemo alini e'a ae'a hakalo hu'a hapa nepaiya vaya'mogimo lapa paisaya gemo alita fako hutapa afiyo. 30Goti'a anifi'mo mago mai'nisiya vekae'mo mago gemo ha paisigeno'ae'mo ge nehisiya vekamo'mo ge huno hano hutesigeno'ae'mo alu vekamo'mo lapa paino. 31Muki'amogitapamo Gotitegati'mo alisaya gemo aeta hakalo hutapa hapa paite hapa paite hugae. Hisage'apae'mo muki'amogimo alagepa hu'a afite'a alige lokiya vai'a maige hu'a maisayafe'mae. 32Gotitegati gemo alini e'a ae'a hakalo hu'a hapa nepaiya vaya'mogimo apakai'api apaune'apamete'mo ne'yagaiye. 33Ani kavatefe'mo Goti'a apano aete'a apavamusa gemo'mo nehiya agufa kava'mo aepa vekamo o'mai'nifa alagepa hu'a magokepi lokae'a maisaya kava'mo aepa vekamo mai'niye.

34Lapakaemo muki siosi'ale siosi'ale'mo alita anupa huta maisaya afina'mo a'ne anaga'mogimo ge osu'a afa'a maigae. A'nemogimo ge osu'a afe'alumelaga maisaya kava'mo hane'niye. Ke'aepa gemo'a ani agufa gemo hu'niye. 35A'nemogimo mago gemo loka hu'a apafi gesayafe'mo hisayana u'a no'apifilagamo anau'apimogife'mo apafi geyo. A'nemogimo siosi vaya'mo ali'a anupa hu'a maisayapi'mo ge hisayana apavagage hisiya kava'mo hane'niye. 36Lapakaemo Goti ge'amo aepa vaya'mo mai'nafiye. Goti ge'amo lapakaetefeke'mo e'nifiye. 37Lapakaepati'mo mago'amogimo, Gotitegati gemo aliniteta aeta hakalo huta hapa nepauna vaya'mo mai'none, hu'a nehisafi Goti Auneme'amo'mo alino lami'nigeta himamu'amo ali'none, hu'a nehisafi hu'a nehisayana avo'mo nekaovanageno lapakaetegamo ani avo'mo visigetapae'mo lekana paitapa afitetapae'mo Ala kava ne'mo'a, hiyo, huno hu'niya gemo hane'niye, hutapa hugae. 38Mago vekamo'a ge'nimo o'afisiyana alagi ge o'afi vekamo maigiye.

39Konaga'nimogitapae, hu'na, Ani kavatefe'mo Gotitegati gemo alinitetapa aeta hakalo hisayafe'mo lapaya mukiki hutapa vegala aeyo. Alu apake alu apakemo aisaya vaya'aife'mo ha'ao hutapa osiyo. 40Alita anupa hutapa mai'netapae'mo muki kava'amo hisayafe'mo alagepa kava'age'mo nehutapa api kava'mo hiyo.